ភ្នំពេញ៖ សាច់បង្កក ១៨ ៨៤៨គីឡូក្រាមដោយគ្មានច្បាប់អនុញ្ញាត ត្រូវបានមន្ត្រីជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច សហការជាមួយមន្ត្រីជំនាញនាយកដ្ឋានសុខភាពសត្វ និងសុខភាពសាធារណ:បសុព្យាបាល រួមនិងអាជ្ញាធរមូលដ្ឋាន បង្ក្រាបបាននៅខណ្ឌច្បារអំពៅនាថ្ងៃទី២៦ ខែធ្នូ ឆ្នាំ២០២៣។

សាច់បង្កកដែលបង្រ្កាបបានមាន សាច់គោ សាច់ជ្រូក សាច់ទា សាច់មាន់ និងគ្រឿងក្នុង។ សមត្ថកិច្ចជំនាញបង្រ្កាបបានសាច់បង្កកគ្មានច្បាប់អនុញ្ញាតនៅទីតាំងចំនួន២ គឺទីតាំងទី១ នៅដីឡូតិ៍គ្មានលេខ ផ្លូវលំ សង្កាត់និរោធន៍ ខណ្ឌច្បារអំពៅ និងទីតាំងទី២ នៅដីឡូតិ៍គ្មានលេខ ផ្លូវលេខ៣៥១ សង្កាត់និរោធន៍។

ប្រតិបត្តិការបង្រ្កាបនេះធ្វើឡើងក្រោមការដឹកនាំសម្របសម្រួលនីតិវិធីផ្ទាល់ពីលោកព្រះរាជអាជ្ញារង ម៉ុត ដារ៉ា។ ក្រោយពីការឆែកឆេរ និងត្រួតពិនិត្យជាក់ស្តែង សមត្ថកិច្ចបានរកឃើញវត្ថុតាងសាច់ជ្រូក សាច់គោ សាច់ទា សាច់មាន់ និងគ្រឿងក្នុងបង្កកសរុបទម្ងន់ ១៨ ៨៤៨គីឡូក្រាម។

ទីតាំងខាងលើ ត្រូវបានលោកព្រះរាជអាជ្ញារង បានសម្រេចឲ្យបិទប្លុំបេរកុងទីន័រក្លាសេ្ស និងបាននាំខ្លួនជនសង្ស័យទាំង ២នាក់ដែលជាម្ចាស់ទីតាំងមកនាយកដ្ឋាន ដើម្បីសាកសួរបំភ្លឺតាមនីតិវិធី៕